جميع قطاعات الألومنيوم تقوم بنفس المهام، الفتح والاغلاق ومنع دخول الهواء والأتربه ومع الضوضاء، ولكن تختلف من ناحية الاستخدام طبقا للفتحة المعمارية، بمعني لو عندنا باب عرضه ٤ متر وارتفاع ٢ متر صعب جدا اننا نستخدم قطاع بي اس صغير ٢ ضلفه جرار، لأن النتيجه فالنهاية هتكون ان الضلف مش هتتحرك وهتكون ثقيلة جدا، ولو استخدمنا قطاع جامبو مثلا في شباك مساحته متر * متر هتحس ان مفيش شباك اصلا ومساحة الالومنيوم اكبر من مساحة فتحة الشباك وطبعا حركة الضلف مش هتكون مريحة إطلاقا.
لذلك الفرق في استخدام قطاعات الألومنيوم بيكون حسب معيار “مقاس” الفتحة المعمارية، ومعيار الحد الأقصي لوزن الضلفه.
بمعني اوضح،
١- المقاسات الصغيرة “سمول اوبينينج” بيتناسب معاها قطاعات صغيره.
مثلا مقاسات بداية من ١*١ متر وحتى ٢*٢ متر، بيتناسب معاها قطاعات بي اس صغير من شركة السلام والتانجو من شركة الشريف و٩٢٠٠ من شركة الوميل.
٢- مقاسات متوسطه “ميديم اوبينينج” بيتناسب معاها قطاعات كبيره.
بتبدأ من ٢ متر وحتى ٣ متر عرض وارتفاع حتى ٣ متر.
بيتناسب معاها قطاعات بي اس كبير من شركة السلام، وقطاع جامبو من شركة الشريف، وقطاع ١٤٠٠٠ من الوميل.
٣- مقاسات كبيرة “لارج اوبينينج” بيتناسب معاها قطاعات كبيره او صغيره.
بتبدأ من ٣ متر وحتى ٦ متر عرض، وارتفاع حتى ٣ متر.
فالحالة دي بيكون متاح اختيارين، إما استخدام قطاعات كبيرة في حالة جرار ٢ ضلفه زي قطاعات الجامبو وقطاع ١٤٠٠٠، لكن بندعم الضلف بعجل جرار دبل وأكثر من عجلتين فالضلفه الواحدة.
او بنستخدم اي قطاع عادي جدا لكن بيكون ٣ ضلفه جرار او ٤ ضلفه جرار، وبردو بندعم الضلف باكثر من طقم عجل جرار دبل علشان حركة الضلف تكون سهله ومريحه.